१२ माघ, धनकुटा। ताप्लेजुङको फुङलिङ नगरपालिका– ११ पाथिभरा क्षेत्रमा केबलकार निर्माणको विरोधमा उत्रिएका ‘नो केबलकार समूह’माथि प्रहरीले गोली चलाएको छ । प्रहरीले चलाएको गोली लागेर शनिबार साझ दुईजना गम्भीर घाइते भएका छन् । गोली लागेर धर्मान पालुङ्वा र यमबहादुर लिम्बू घाइते भएका हुन् । दुवै घाइतेको ताप्लेजुङस्थित जिल्ला अस्पतालमा उपचार भइरहेको छ ।
गोली लागेका एकजनालाई केही अघि र अर्का एकको भर्खरै अस्पताल ल्याइएको ताप्लेजुङका प्रमुख जिल्ला अधिकारी नेत्रप्रसाद शर्माले जानकारी दिए । पाथिभरा क्षेत्रको बलुडाडा आसपास सुरक्षाकर्मी र केबलकार विरोधी पक्षबीच झडप हुँदा प्रहरीले गोली चलाएको शर्माले जानकारी दिए । त्यसक्षेत्रमा शनिवारदिनभर नै झडप भइरहेको थियो । त्यसक्रममा पहिचान पक्षधर र सुरक्षाकर्मी गरि १८ जना घाईतेभएका थिए ।
