आठपहरिया समुदायको सबैभन्दा ठूलो चाड मंसीरे चाड सुरु
धनकुटा ।धनकुटामा मुख्य थातथलो भएका आठपहरीया समुदायले उठौली अनुष्ठानको आयोजना गरे सँगै आठपरिया समुदायको सबैभन्दा ठूलो चाड मंसीरे चाड सुरु भएको छ ।
मंसिरे अर्थात् ’वाडाङमेट’ आठपहरिया समुदायको सबैभन्दा ठूलो चाड हो । मंसिरे चाडको पूर्वसन्ध्यामा आठपहरिया समुदायले दैविक आह्वानका लागि उठौली पूजा गर्ने परम्परा रहेकोछ । उठौली पूजा परम्परागत र सांस्कृतिक झाँकीले भरिपूर्ण एक विशेष धार्मिक अनुष्ठान सम्पन्न भएको छ, जसले समुदायको सांस्कृतिक धरोहर र परम्परालाई उजागर गरेको छ । आठपहरीया समुदायको उठौली अनुष्ठान एक महत्वपूर्ण धार्मिक पर्व हो, जुन प्रायः प्रत्येक वर्ष धनकुटा र आसपासका विभिन्न स्थानहरूमा हर्षोल्लासका साथ मनाइन्छ।
यस चाडको प्रमुख उद्देश्य भनेको समुदायका सदस्यहरूको एकता, धार्मिक आस्थाको सशक्तिकरण र परंपरागत संस्कृतिको संरक्षण गर्नु रहेको आठपहरिया समुदायका अगुवाले जानकारी दिएका छन ।
धनकुटा नगरपालिकाको श्रीपञ्चमी, ठूलोघर, लुङदाङ, सिप्तेन, चारिङ्मे, होम्बारक लगायत २१ थलोका आठपहरियाले तिथि हेरेर छुट्टाछुट्टै गुठीघरबाट माङ उठाउने गर्छन् ।
यो समयमा उनीहरु आ–आफ्नो गुठीघरमा भेला भएर मुन्धुम गाउँदै इष्टदेवसँग वरदान माग्ने गर्छन् । आठपरिया समुदायका सदस्यहरूका अनुसार, यो पर्व उनीहरूको सांस्कृतिक पहिचान र सामाजिक जडानको प्रतीक हो। यस चाडले उनीहरूको पारंपरिक जीवनशैली, भेषभूषा, र सांस्कृतिक मूल्यहरूको संरक्षण गर्न महत्वपूर्ण भूमिका खेल्दछ। यो चाडले समुदायको धार्मिक र सांस्कृतिक मूल्य मान्यतालाई नयाँ पुस्तासम्म पुर्याउने विश्वास उनीहरुमा छ ।
