धनकुटा १२ मंसिर । स्थानीय पाठ्यक्रमअन्तर्गत कक्षा ८ का विद्यार्थीहरूलाई विपद् जोखिम न्यूनीकरण तथा तयारीसम्बन्धी विषय प्रभावकारी रूपमा पढाउन शिक्षकलाई लक्षित गरी प्रशिक्षक प्रशिक्षण तालिम सुरु गरिएको छ ।
धनकुटा नगरपालिका भित्रका सामुदायिक तथा संस्थागत माध्यमिक तहका विद्यालयका शिक्षकहरूलाई आजदेखि तालिम दिन सुरु गरिएको हो ।
तालिममा सहभागी शिक्षकहरूलाई विद्यालय तहमा विपद्–तयारीका विषय कसरी प्रभावकारी रूपमा सिकाउने भन्नेबारे व्यावहारिक अभ्यास र श्रव्य–दृश्य सामग्रीको प्रयोगमार्फत प्रशिक्षण भईरहेको आयोजकले जनाएको छ । नेपालका पहाडी भूभागमा पछिल्ला वर्षहरूमा विपद् जोखिम बढ्दै गएको भन्दै विद्यालय तहबाटै सचेतना अभिवृद्धि गर्न यस्तो तालिम आवश्यक रहेको र नगरले तयार गरेको स्थानीय पाठ्यक्रममा यो समावेस समेत गरिएको धनकुटा नगरपालिकाका आर्थिक विकास अधिकृत विकास अधिकारीले जानकारी दिनुभयो । तालिममार्फत प्रशिक्षित शिक्षकहरूले आगामी दिनमा आफ्ना–आफ्ना विद्यालयमा विद्यार्थी तथा समुदायलाई विपद् तयारीसम्बन्धी शिक्षा अझ प्रभावकारी रूपमा प्रदान गर्ने विश्वास नगरले लिइएको नगरप्रमुख चिन्तन तामाङले बताउनुभयो । यो तालिमले विद्यार्थीलाई सुरक्षित रहन सिकाउने मात्र होइन, विपद्को पूर्वतयारी र सुरक्षित व्यवहारको संस्कार पनि विकास गर्न सहयोग पुग्ने नगरप्रमुख तामाङको भनाई छ । तालिम धनकुटा नगरपालिका र इसिमोड को संयुक्त आयोजनामा सञ्चालन भईरहेको छ । १४ गतेसम्म चल्ने तालिमको स्थानीय संयोजन ‘हुसाडेक नेपाल’ ले गरेको छ भने अष्ट्रेलियन एडले आर्थिक सहयोग गरेको जनाइएको छ ।
