काठमाडौं । राज्य व्यवस्था तथा सुशासन समितिमा अख्तियार दुरुपयोग अनुसन्धान आयोगका आयुक्तहरु खुला प्रतिस्पर्धाबाट छनोट गर्ने प्रस्ताव आएको छ ।
अख्तियार दुरुपयोग अनुसन्धान आयोग ऐनलाई संशोधन गर्ने बनेको विधेयक राज्य व्यवस्थामा छलफलमा छ । छलफलमा कतिपय सांसदले सेवा निवृत्त निजामती कर्मचारीलाई अख्तियारमा लैजान नहुने मत राखेका छन् ।उक्त छलफलमा खुला प्रतिस्पर्धाबाट छान्ने विधि उपयुक्त हुनसक्ने सत्तारुढ नेपाली कांग्रेसका महामन्त्री विश्वप्रकाश शर्माले बताए ।‘ अख्तियारका प्रमुख र आयुक्तहरू छान्न खुला प्रतिस्पर्धाबाट जाने एउटा विधिको खोजी गर्नु उपयुक्त हुन सक्छ कि ’ शुक्रबार समितिको बैठकमा महामन्त्री शर्माले भने । उनले अगाडि भने, ‘सरकारले एउटा खरदार नियुक्त गर्दा खुला प्रतिस्प्रर्धाबाट आउँछ । लोकसेवाको प्रक्रियाहरु पूरा गरेर आउनुपर्छ । राज्यकै अख्तियार दुरुपयोगबारे अनुसन्धान गर्ने व्यक्ति नियुक्तिको प्रक्रियालाई एकचोटी समीक्षा गरेर जानुपर्छ कि ’
संवैधानिक परिषदले अख्तियारका पदाधिकारी सिफारिस गर्ने व्यवस्था पुनरावलोकन गर्नुपर्नेमा महामन्त्रि शर्माको जोड छ । संविधानको धारा २३८ मा अख्तियार दुरुपयोग अनुसन्धान आयोग सम्बन्धी व्यवस्था छ, जसअनुसार प्रमुख आयुक्त र आयुक्तहरु संवैधानिक परिषदको सिफारिसमा राष्ट्रपतिले नियुक्त गर्ने प्रावधान छ । ‘राष्ट्रपतिले संवैधानिक परिषदको सिफारिसमा प्रमुख आयुक्त र आयुक्तको नियुक्ति गर्नेछ’ संविधानको धारा २३८ को उपधारा २ मा भनिएको छ । प्रधानमन्त्री अध्यक्ष रहने संवैधानिक परिषद्मा प्रधानन्यायाधीश, सभामुख, राष्ट्रिय सभाको अध्यक्ष, विपक्षी दलको नेता र उपसभामुख सदस्य रहन्छन् । तर पछिल्लो समय संवैधानिक परिषदले दलीय भागवण्डाका आधारमा आयुक्तहरु सिफारिस गर्ने गरेकाले प्रश्न उठेको छ । कांग्रेस महामन्त्री शर्मा पनि परिषदमा राजनीतिक पृष्ठभूमिका व्यक्तिहरू हुने भएकाले राजनीतिक दलमा नरहेका वा नलागेका व्यक्ति अख्तियार जस्तो संस्थामा पुग्ने सम्भावना कम हुने बताउँछन् । जबकी नियुक्ति हुँदाका बखत कुनै राजनीतिक दलको सदस्य नरहेको हुनुपर्ने संवैधानिक व्यवस्था छ । संविधानको धारा २३८ को उपधारा ६ मा आयोगका प्रमुख आयुक्त र आयुक्तहरूको योग्यता सम्बन्धी व्यवस्था छ । धारा २३८ को उपधारा ६ ९ख० मा भनिएको छ, ‘नियुक्ति हुँदाका बखत कुनै राजनीतिक दलको सदस्य नरहेको ।’ तर संवैधानिक परिषदबाट नियुक्ति सिफारिस गर्दा यस्सको मर्मको पालना हुन नसकेको महामन्ञि शर्मा बताउँछन् ।
सत्तारुढ नेकपा एमालेका सांसद हेमराज राईले पनि निजामति कर्मचारीमा सेवामा रहँदा अनुसन्धानको क्षेत्रमा रहेकालाई अख्तियार पठाउन नहुने प्रस्ताव गरे । यसो गर्दा कतिपय मुद्दा सही रुपमा अख्तियारबाट अगाडि बढ्न नसक्ने वा अन्यथा हुन सक्ने उनको आशंका छ ।कतिपय सांसदले पूर्वप्रशासकलाई अख्तियार पठाउनै नहुने बताएका छन् । समिति सभापति खतिवडाका अनुसार पूर्वप्रशासकलाई अख्तियार पठाउने सम्बन्धमा दुई थरी प्रस्ताव आएका छन् ।
एउटा रिटायर्डपछि संवैधानिक नियुक्तिमा जाने हो भने निश्चित अवधि जान नपाउने (कुलिन पिरियड) राख्नुपर्छ ।
सभापति खतिवडाले गत सोमबारको समिति बैठकपछि भनेका थिए, ‘अख्तियारमा हामीले रिटायर्डपछि लैजानेरनलैजाने एउटा विषय छ । यो विषयमा निर्णय लिनुपर्ने हुन सक्छ ।’
सांसदहरूले पनि पूर्वप्रशासकलाई पठाउँदा प्रभावकारी काम नभएको दाबी गरेका छन् । प्रमुख प्रतिपक्षी माओवादी सांसद माधव सापकोटा जिन्दगीभरी अख्तियारकै परिचालन गर्ने, र उत्तरार्धमा आएर आयोगमा जाने अभ्यास गलत भएको बताउँछन् ।
‘कर्मचारीबाट अवकाश प्राप्त भएपछि अख्तियारको प्रमुख एवं पदाधिकारी हुन भएन’ उनले भने, ‘राजनीतिक रुपमा पनि कति आग्रह पूर्वाग्रह राखियो रु यसमा समेत ख्याल गरेर सुधारमा जानुको विकल्प छैन ।’
एकीकृत समाजवादीका सांसद शेरबहादुर कुँवर अख्तियारलाई स्वतन्त्रतापूर्वक काम गर्ने वतावरणका लागि सबै गम्भीर बन्नुपर्ने सुझाउँछन् । ‘अख्तियारलाई निश्पक्ष र स्वतन्त्र बनाउनैपर्छ । यसका लागि सहयोग पुग्ने गरी पदाधिकारी नियुक्त हुने गरी ऐन बनाऔं’ कुँवरको प्रस्ताव छ ।
यस्तै नेपाल मजदुर किसान पार्टी ९नेमकिपा० का सांसद प्रेम सुवाल पनि अवकाशप्राप्त कर्मचारीलाई अख्तियारको नेतृत्वमा लैजाँदा अपेक्षित काम हुन नसकेको दाबी गर्छन् । उनले अगाडि भने, ‘कर्मचारी हुँदा गरेको काम, सम्बन्ध तथा राजनीतिक आवद्धताका आधारमा अनुसन्धानका विषय अगाडि बढ्ने र नबढ्ने अवस्था छ ।’
सुवालले अख्तियारमा पूर्वप्रशासक नलैजाने प्रावधान अख्तियार दुरुपयोग अनुसन्धान सम्बन्धी ऐनमा राख्नुपर्ने बताए ।
अख्तियारसम्बन्धी विधेयकमा रहेका प्रस्ताव र सांसदहरूको संशोधनलाई एकीकृत गरेर विधेयकमा सहमति जुटाउने जिम्मा राज्य व्यवस्था तथा सुशासन समितिले उपसमितिलाई दिएको छ । सांसद हृदयराम थानीको नेतृत्वमा १२ सदस्यीय उपसमितिलाई १५ दिनभित्र सहमति जुटाएर प्रतिवेदन पेश गर्ने जिम्मेवारी दिइएको छ ।
sabar: online khabar.com
