२० चैत,धनकुटा । मर्यादित सहकारी समुन्नत समाज भन्ने नाराका साथ बुधबार ६८ औं राष्ट्रिय सहकारी दिवसको अवसरमा धनकुटामा प्रभात फेरि आयोजना गरिएको छ । ६८औं राष्ट्रिय सहकारी दिवस तथा अन्तर्राष्ट्रिय सहकारी वर्ष २०२५ को उपलक्ष्यमा जिल्ला सहकारी संघ धनकुटाले प्रभात फेरीको आयोजना गरेको हो। प्रभात फेरीका सहभागीले सहकारीमा सुशासन, स्वाधीन अर्थतन्त्रका लागि सहकारी, मर्यादित श्रम र पर्यटनमा सहकारी लेखिएका प्लेकार्ड बोकेका थिए।
प्रभात फेरि धनकुटा सदमुकामको मदन चौकबाट सुरू भएर हुलाकटोल, भीमनारायण चौक हुँदै श्रीपन्चमी पार्कमा पुगेर सभामा परिणत भएको थियो।
सभामा श्रपिञ्चमी पार्कमा रहेका १३ जना अनाथ बालबालिकालाई स्टेशनरि तथा फलफूल वितरण गरिएको थियो । यस्तै सभाका वत्ताहरुले सहकारी दिवसमा भनिएको मर्यादित सहकारी समुन्नत समाज नारा अनुसार सहकारीहरु सञ्चालन हुनुपर्ने बताएका छन्। उनीहरुले सहकारीमा बचत अपचलन देखिका विभिन्न समस्याहरु बाहिर आइरहेकाले त्यस्तो हुन नदिन सबै सरोकारवाला पक्ष संवेदनशील हुनुपर्ने बताएका थिए।
कार्यक्रममा जिल्ला समन्वय समिति धनकुटाका प्रमुख निरेन तामाङ, धनकुटाका प्रमुख जिल्ला अधिकारी टुवराज पोख्रेल लगायतले धारणा राख्नुभएको थियो। धनकुटामा बचत तथा ऋण, दुग्ध, पर्यटन, बहुउद्देश्यीय, कृषि, कर्मचारी, शिक्षक र विद्युतलगायत ३ सय २० सहकारी संस्था संचालनमा रहेको जिल्ला सहकारी संघ धनकुटाका अध्यक्ष खगेन्द्र प्रसाद सुवेदीले जानकारी दिनुभयो।
