१३ मंसिर धनकुटा । नेकपा एमालेको ११औँ राष्ट्रिय महाधिवेशनका लागि प्रतिनिधि छनौट प्रक्रियामा धनकुटामा गम्भीर विवाद उत्पन्न भएको छ। सहमतिमै उमेदवारी फिर्ता लिन लगाएर त्यसपछि मतदान गराउने प्रयास गरेको आरोप लगाउँदै इन्द्रमणी पराजुली नेतृत्वको असन्तुष्ट समूहले आज धनकुटामा पत्रकार सम्मेलन गर्दै चुनाव प्रक्रियालाई पूर्ण रूपमा अस्वीकार गरेको घोषणा गरेको हो।
पत्रकार सम्मेलनमार्फत उनले कोशी प्रदेश कमिटीका सदस्य इन्द्रमणी पराजुलीले अधिकांश उमेदवारलाई मनोनयन फिर्ता लिन दबाब दिइएको र पार्टी सदस्यमतदाताहरूलाई झुक्याएर मतदान प्रक्रियामा लैजान खोजिएको आरोप लगाए। पराजुली पक्षले ‘गुट मजबुत बनाउने नाममा पार्टी कमजोर बनाउने प्रयास भइरहेको’ आरोप लगाउँदै यस्तो परिस्थितिमा भएको मतदान प्रक्रिया नै अमान्य हुने स्पष्ट गरेको छ। उनले भने, “उम्मेदवारी फिर्ता गरियो, अन्तिममा भने मतदान गर्न लगाइयो। यस्तो मनोमानी निर्वाचन प्रक्रियालाई हामीले मान्यता दिन सक्दैनौँ।”
उनका अनुसार मतदानका लागि वातावरण नै पूर्ण रूपमा विकृत भएको र मनोमानी हिसाबमै मतदान गराउन खोजिएकाले त्यसको कुनै आधारभूत वैधानिकता नरहने बताएका छन्। यता महालक्ष्मी नगर कमिटी अध्यक्ष कमल कार्कीले पनि पालिका कमिटीको आधिकारिक जानकारी नै नदिई गुटगत शक्तिबलमा चुनावी प्रक्रिया थोपर्न खोजिएको बताउँदै निर्वाचन बहिष्कार गर्ने घोषणा गरेका छन्। पत्रकार सम्मेलनमा एमाले केन्द्रिय सदस्य सकुन्तला बस्नेत, नेता चन्द्र बस्नेत, निरेन तामाङ, मञ्जु अधिकारी, बलदीप राई, , तारा तितुङ लगायतको सहभागिता रहेको थियो। यता राजेन्द्र राई पक्षले भने लामो सहमतीको प्रयास पछि पनि सहमती नजुटेपछी निर्वाचन कार्यतालिका अनुसार मतदान प्रक्रिया अघि बढाईएको जनाएको छ ।
