२४ असोज काठमाण्डौ । नेपाली कांग्रेसले वर्तमान सरकारको गतिविधिका कारण तोकिएको समयमा निर्वाचन हुनेमा आशंका व्यक्त गरेको छ । शुक्रबार पार्टी कार्यालय सानेपामा बसेको पदाधिकारीसहित कार्यसम्पादन समिति सदस्यहरुको बैठकले निर्वाचनमा जाने कुरालाई सकारात्मक रुपमा लिएपनि सरकार निर्वाचनको वातावरण बनाउन गम्भीर नदिखिएको निष्कर्ष निकालेको हो ।
बैठकपछि कांग्रेस प्रवक्ता डा प्रकाशशरण महतले कांग्रेस जनतामा विश्वास गर्ने पार्टी भएकाले जनतामा जाने कुरालाई नकार्न नसक्ने भन्दै सरकार निर्वाचनको राम्रो वातावरण बनाउन गम्भीर नदेखिएको बताए । उनले जेनजी आन्दोलनका क्रममा घटेका घटनाको छानबिनका लागि आयोगले निष्पक्ष काम गर्नुपर्नेमा कांग्रेसका सवै नेताहरुको जोड रहेको उल्लेख गरे ।
महतले बैठकमा पार्टी महाधिवेशनको बिषयमा बिभिन्न कोणबाट छलफल भइरहेको भन्दै केन्द्रीय समितिको बैठकमा सहमतिका साथ महाधिवेशनको एजेण्डा प्रस्तुत हुने जानकारी दिए । आइतबारबाट सुरु हुने केन्द्रीय समिति बैठकमा पार्टी सभापति देउवा उपस्थीत हुने उनले जानकारी दिए ।
