१५ भदौ २०८२,धनकुटा । जनताको भूमिको अधिकार खोस्न सरकारले ल्याएको भूमिधिकार विधेयकविरुद्ध आइतबार धनकुटामा विरोध प्रदर्शन गरिएको छ । “भूमि र वन बचाऔं, देशलाई मरुभूमि हुनबाट जोगाऔं“ भन्ने नारासहित प्रद्धशन गरिएको थियो।
जनता समाजवादी पार्टी नेपाल (जसपा) धनकुटा जिल्ला समितिद्वारा आयोजित कार्यक्रममा सरकारले ल्याएको विधेयकको तीव्र विरोध गर्दै सरकारलाई तत्काल यसलाई फिर्ता लिन चेतावनी दिएको छ । प्रदर्शनमा सहभागीहरूले जनघाती विधेयक खारेज गर, भूमि अधिकार सुरक्षित गर जस्ता नारासहित सरकारविरुद्ध आक्रोश प्रकट गरेका थिए । जसपाका जिल्ला नेताहरूले सम्बोधन गर्दै भने, “यो विधेयक किसान र सामान्य जनताको हकहितविरुद्ध छ। यसले आम जनतालाई भूमिहीन बनाउने खतरा रहेको छ। यदि विधेयक फिर्ता लिइएन भने अझ व्यापक आन्दोलन गर्नेछौं।”
प्रदर्शनमा काठमाडौँस्थित नेतृत्वलाई पनि कडा सन्देश दिइएको छ, जसअनुसार जनताको भूमिअधिकार र वातावरण संरक्षणको पक्षमा कुनै सम्झौता नगर्न चेतावनी दिइएको हो।
