धनकुटा, मंसिर १३ — नेकपा एमाले जिल्ला समिति धनकुटाले यही मंसिर २० देखि २३ गतेसम्म काठमाडौंमा हुने ११औँ महाधिवेशनका लागि धनकुटाबाट प्रतिनिधि छनोट प्रक्रियामा केही व्यक्तिहरूले भ्रम फैलाउन खोजेको भन्दै कडा आपत्ति जनाएको छ। जिल्लाबाट खुला तर्फ ९ जना, महिला तर्फ ४ जना, युवा र दलिततर्फ १।१ जना गरी कुल १३ जना प्रतिनिधि चयन गर्नुपर्ने निर्धारित संख्या रहेको जनाएको जिल्ला समितिले प्रेस विज्ञप्तिमार्फत जनाएको हो। प्रतिनिधि छनोटमा कुनै प्रकारको अन्तरविरोध वा असहज परिस्थिति नरहेको बताउँदै विज्ञप्तिमा सबै प्रक्रिया केन्द्रीय निर्देशनअनुसार नै सम्पन्न भएको स्पष्ट गरिएको छ। जिल्ला समितिका अनुसार लोकतान्त्रिक पद्धतिबाट प्रतिनिधि चयनको निर्णय गरेको हो ,उक्त निर्णयलाई केही व्यक्तिहरूले सामाजिक सञ्जालमार्फत गलत रूपमा प्रस्तुत गरेको भन्दै विज्ञप्तिमा आपत्ति जनाइएको छ। जिल्ला अध्यक्ष शिव आङलाद्वारा जारी विज्ञप्तिमा धनकुटा नगरपालिका–७ तथा ६ का मतदान केन्द्रमा एमालेका सदस्यहरूलाई अनावश्यक विवाद, अपमानजनक टिप्पणी तथा गालीगलौज गर्ने, मतदानमा प्रभाव पार्नेजस्ता गतिविधि कुनै पनि हालतमा स्वीकार्य नहुने उल्लेख छ। विज्ञप्तिमा भनिएको छ, “पार्टीभित्र लोकतान्त्रिक छलफल परम्परा रहँदै आएको छ। प्रतिनिधि छनोट प्रक्रियामा सहभागी सबै जनाको सक्रियता उल्लेखनीय रह्यो। तर केहि व्यक्तिहरूले व्यक्तिगत स्वार्थका लागि गलत सूचना फैलाएर पार्टीको अनुशासन उल्लंघन गरेका छन्।”एमाले धनकुटाले पार्टी सदस्य, शुभेच्छुक तथा सर्वसाधारणलाई भ्रामक प्रचारमा नपरी संगठनले सार्वजनिक गरेको आधिकारिक सूचनामाथि नै भरोसा राख्न आग्रह गरेको छ। साथै, यस प्रकारको गतिविधि दोहोरिए कडा कदम चालिने चेतावनी पनि दिएको छ।
