१४ भदौ २०८२,धनकुटा । नेपाली काँग्रेसका कोशीका नेताहरू जिल्ला दौडाहामा निस्किएका छन् । संविधान संशोधन, राष्ट्रिय परिचयपत्र वितरणमा देखिएका समस्या, नयाँ क्रियाशील सदस्यता वितरण तथा नवीकरण, गठबन्धन सरकारले गरेका कामकाज र विकास निर्माणबारे सुझाव संकलनका लागि उनीहरू जिल्लामा पुगेका हुन् । मोरङका सभापति तथा पूर्वमन्त्री डिगबहादुर लिम्बु, ताप्लेजुङका सभापति गजेन्द्र तुम्याहाङ, पाँचथरका सभापति रूपनारायण जगेवु, मोरङ सचिव मोदराज घिमिरेलगायतको टोलीले पाँचथर, तेह्रथुम, ताप्लेजुङ र धनकुटा पुगेर भ्रातृ तथा शुभेच्छुक संगठनका पदाधिकारी र सदस्यसँग छलफल गरेका छन् । छलफलमार्फत गठबन्धन सरकारको प्रभावकारिता, पार्टी संगठनात्मक स्थिति तथा आगामी रणनीतिबारे सुझाव संकलन गरिएको छ । संकलित सुझावलाई पार्टीको प्रदेश र केन्द्रीय समितिमा पेश गरिने मोरङका सभापति लिम्बूले बताउनु भएको छ ।
